საქართველოს ეროვნულ ბოტანიკურ ბაღში არსებულ იაპონურ ბაღს აღდგენის სამუშაოები ჩაუტარდა, რომელიც თბილისის მერიის, საქართველოში იაპონიის საელჩოს მხარდაჭერით და კომპანია JTI-ის პარტნიორობით განხორციელდა.
თბილისის საკრებულოს ინფორმაციით, დასრულებული სამუშაოები თბილისის საკრებულოს გარემოს დაცვის კომისიის თავმჯდომარე ნიკო კახეთელიძემ დაათვალიერა და ბაღში გამართულ ჩაის ცერემონიას დაესწრო, რომელსაც ტოკიოდან მოწვეული ოსტატი უძღვებოდა.
პროექტის ფარგლებში, აღდგა იაპონურ ბაღში არსებული დაზიანებული ისეთი ელემენტები, როგორებიცაა: ტორის ჭიშკარი, მინიატიურული ხიდი, ცერემონიების სცენა და სხვა.
სამუშაოები თავდაპირველი პროექტის მსგავსად, საქართველოს ეროვნული ბოტანიკური ბაღის მიმართვის საფუძველზე, იაპონური ლანდშაფტური კომპანია „კოსუგის“ (Kosugi Zohen Co) მიერ, ლანდშაფტის არქიტექტორის, საერთაშორისო პროექტების მენეჯერის, ანდრეას ჰამაჰერის უშუალო ხელმძღვანელობით განხორციელდა.
პროცესში ასევე იაპონელი სპეციალისტები, საქართველოს ეროვნული ბოტანიკური ბაღის მებაღეები და ტექნიკოსები მონაწილეობდნენ.
ღონისძიებას ბოტანიკური ბაღის დირექტორი, საქართველოში იაპონიის ელჩი იშიძუკა ჰიდეკი, ასევე ამერიკის შეერთებული შტატების საგანგებო და სრულუფლებიანი ელჩი საქართველოში რობინ დანიგანი და სხვა მოწვეული სტუმრები დაესწრნენ.