უკრაინის პრეზიდენტმა, ვოლოდიმირ ზელენსკიმ განაცხადა, რომ უკრაინა გაეროს არ განიხილავს, როგორც სამშვიდობო ძალების ან უსაფრთხოების გარანტიების ალტერნატივას.
„გაერო ვერ დაგვიცავს ოკუპაციისგან ან პუტინის ხელახლა მოსვლის სურვილისგან. ჩვენ გაეროს არ განვიხილავთ, როგორც კონტინგენტის ან უსაფრთხოების გარანტიების ალტერნატივას“, – აღნიშნა ვოლოდიმირ ზელენსკიმ.
ამავე დროს, როგორც ვოლოდიმირ ზელენსკიმ განაცხადა, უკრაინა ინარჩუნებს გონივრულ, ლოგიკურ ურთიერთობას გაერთიანებული ერების ორგანიზაციასთან, მის წარმომადგენლებთან და გენერალურ მდივან ანტონიუ გუტერეშთან.
„მაგრამ გაერო ვერ იქნება უსაფრთხოების გარანტიების ალტერნატივა, რადგან გაეროს არ ექნება მანდატი უკრაინის დასაცავად, თუ პუტინი კვლავ ომით მოგვადგება“, – აღნიშნა მან.
მანამდე ბრიტანულმა გამოცემა The Telegraph-მა ინფორმაცია გაავრცელა, რომლის თანახმად, საფრანგეთის პრეზიდენტი, ემანუელ მაკრონი უკრაინაში ევროპული ჯარის გაგზავნის იდეას მხარს აღარ უჭერს და მის ალტერნატივად გაეროს მშვიდობისმყოფელების გაგზავნას განიხილავს.